CARM. I CARM. II CARM. III CARM. IV CARM. SAEC. EP. SERM. I SERM. II EPIST. I EPIST. II A. P.

carmina iii xviii


commentariivarialectioprosodia

Faune, Nympharum fugientum amator,

per meos finis et aprica rura

lenis incedas abeasque parvis

aequus alumnis,

 

5 si tener pleno cadit haedus anno

larga nec desunt Veneris sodali

vina creterrae, vetus ara multo

fumat odore.

 

ludit herboso pecus omne campo,

10 cum tibi nonae redeunt Decembres;

festus in pratis vacat otioso

cum bove pagus;

 

inter audacis lupus errat agnos,

spargit agrestis tibi silva frondes,

15 gaudet invisam pepulisse fossor

ter pede terram.

 

.


   HORATIUS.RU
©  . ., 20082016